Mo

15

Dez

2014

Ho Chi Minh City

Üse letscht Haut in Vietnam isch Ho Chi Minh City. Und was söui säge, es isch ändlech ändlech wider warm und sunnig. Wobi warm liechters ungertribe isch, mir hei nämlech wider gmüetlechi 30 Grad ;) Nachdäm mir scho in Hanoi z Gfüeu hei gha, es herrschi viu Verchehr, simer hie nomou eines besseren belehrt worde. Lut dere vom Busoffice het HCM 10 Millione Iwohner, wovon 60 Prozänt ä Roller besitze. In HCM sig jedi Stung Rush Hour. Und ja, so isches... henne cool zum zueluege, chli weniger cool zum überquere vode Strosse. Während d Fahrt vo Da Lat nach HCM wunderschön und relativ ruhig gsi isch - dr gröscht Teil vor Fahrt geit dürs Hochland, verbi a viele chline Dörfli wo jedes freie Eggeli mit Kafibohne oder Mais usgleit hei - biudet d Stadt z krasse Gägeteil derzue. Aues isch flach, lut und überlade, het aber uf si Art ou ihre Reiz. Scho elei nur imene Kafi z hocke und bimene feine Cocktail dene verschidene Roller und ihrere kunterbunte Beladig zue z luege, hätt e Tag locker gfüut. Do wird eifach aus mitem Roller transportiert. Dr Maler het sini Mitarbeiter plus z ganze Material uf ei Roller glade, e angere het si gross Drucker ufem Bike transportiert (Ruedi i weiss nid wieso Du Dir so Sorge gmacht het, dr gross Drucker im PO d Stäge ab z trage... Die Dinger si anschinend so stabil, das si sogar ä houprigi Rollerfahrt locker überstöh :p), ä dritte het Lastwagepneu so züglet. I ha zwar immer wider Biudli vo däm luschtige Tribe gse, aber das mou in Ächt z erläbe, das toppt aus. Die Stadt muesme eifach mou erläbt ha.
Genau so interessant wie der Verchehr aber nid haub so luschtig isch z Chriegsmuseum und dr Bsuech vode Cu Chi Tunnels gsi. Z Museum isch relativ gross und absolut schonigslos. Die Biuder wo do usgsteut si, sowie ou z Gebäude mitemene Teil vo Phu Coc, däm früechere Gfängnis ufere Insle wo d Amerikaner dört errichtet hei, isch richtig heftig. I dänke 90 Prozänt vo aune Biuder dörfte ir Schwiz gar nid zeigt wärde, das wär zensiert. Es isch uf die einti Sitte extrem hert zum das gse und es wird eim z einte oder angere mou angers, aber es isch ou guet, mou die würklechi Realität z gse, und zwar schonigslos. Ds Museum isch zwar sehr eisittig, sprich d Vietnamese si die arme und d Amerikaner die böse, derbi si d Vietnamese ou nid zimperlech gsi und hei d Amerikaner sicher ou nid mit Samthändsche aglängt, aber Tatsach isch, das Mönsche gfouteret, ufs gröbschte Misshandlet und gedemüetiget worde si. Egau weli Sitte wie viu Schuld het, es isch tragisch, das Mönsche überhoupt zu so öppisem fähig si und git eim rächt z dänke. Und weme die Biuder so gset, chame nur erahne, was ide hütige Chriegsländer vor sich geit... Wie viu dört vor Realität nid zeigt wird.
D Cu Chi Tunnels si es Tunnelsystem es paar Kilometer usserhaub vo HCM. Es isch es Tunnelsystem vo 250km, wo während em Chrieg ide 60er und 70er Johr vode Cu Chi's bewohnt worde si. Das Tunnelsystem isch bout worde, zum d Amerikaner chönne z stoppe, resp. um d Agriff vode Amerikaner chönne z Überläbe. Es git drü Tunnelsystem überenang, wobi die oberschte Tunnel zum wohne si, die mittlere zur Kommunikation und zum Transport und die ungerschte zum Schutz. D Tunnel hei ä Durchmässer vo ca. 70 x 70 cm und hei ca. au 20 Meter ä Usgang und äbeso au 20 Meter e Höhli mit Früschluft-Zuefuehr. Kochet isch nur Nachts worde, damit d Amerikaner dr Rouch nid gse. Ufem ganze Areau wo die Tunnel si, si ou aui mügleche Faue ufbout gsi. Die si vor de Amerikaner in erschter Linie zum Fuetergwinn gsi, sprich für Tiger und co., Hei aber när ou im Kampf gäge d Amerikaner gueti Dienschte do... und zwar uf richtig schmärzvoui Art. Ufem Areau gits ou ä Schiessplatz und me het dört d Müglechkeit, jeglechi Waffe uszprobiere, unger angerem aui mügleche M's. MIr hei die nid usprobiert, wenn me aber über das Gländ louft, die Faue und Tunnel gset, d Guides eim d Gschicht verzeue und me im Hingergrund ständig d Gwehr ghört, denn loufts eim zimlech chaut dr Rügge abe. Isch scho sehr idrücklech und zeigt, wie intelligänt die Lüt gsi si, uf die angeri Sitte stimmts aber ou zimlech nachdänklech. Sehr spezieu isches gsi, wenn die vietnamesiche Guides (nid nur üsi, sondern ou die vo angerne Gruppe womer gse hei) übere Chrieg verzeut hei... Me het richtig gmerkt, das si vou stouz druf si, dr Chrieg gwunne z ha und das si überhoupt keis Problem hei, z verzeue, wie d Amerikaner gstorbe si. Im Gägeteil, me het die Martialische Faue sogar mitemene Lache, Witzli uf Chöschte vode Amerikaner und mit ganz viu Stouz vorgsteut. Dr Chrieg und aus was derzue ghört, schiint nonid ganz verdout z si. Wär jemaus in HCM isch, däm chani würklech empfähle, die zwöi Sache go azluege, bitte aber eifach im Hingerchopf ha, dases würklech sehr eisittig dargsteut isch.




0 Kommentare

Fr

12

Dez

2014

Da Lat

Vo Nha Trang isches de witer gange nach Da Lat. Da Lat isch ä grössere Ort im Vietnamesische Highland. Scho d Stross dört häre isch es richtigs Highlight, ou bi Räge. Uf änge Strosse geits 5 Stung lang dr Bärg uf, dür Rägewäuder, a Wasserfäu verbi und mitere wunderbare Ussicht. Z schönschte isch aber, wenn me nachem idunkle in Da Lat ifahrt. Da Lat und die witeri Umgäbig het riese Kafi-, Artischocke-, und Sidefarme. Die ganzi Umgäbig isch dürzoge vo grosse Tribhüser und Nachts si die aui belüchtet. Ökologisch gse sicher nid optimal, aber das Biud wo Da Lat ir Nacht abgit isch wunderschön. Es gset chli us wiene riesegrosse Wiehnachtsmärit ;)
Aber ou bi Tag chasech dä Ort durchus lo gse. Da die meischte Reisende dr Bus vo Hoi An nach Ho Chi Minh City über Mui Né näme und nid über Da Lat, hets hie relativ weni westlechi Tourischte. Hie heimer zum erschte mou üses ganze Zügs zum Iheimische Priis chönne choufe und zwar ohni z Märte. Und mir si ufemene Markt gsi, wo würklech fasch nur Vietnamese gsi. Chli usserhaub vom Zäntrum chame de z reale Läbe miterläbe, do geit so richtig d Poscht ab und es isch schön, däm bunte Vietnamesische Tribe zue z luege. Hie obe heimer de ou zum erschte mou usegfunge, was das für feine Tee isch, wo mir immer gratis zum Ässe serviert bechöme... Es isch Artischocke-Tee. Bis hie häre ha ig gar nid gwüsst, dasme us Artischocke ou cha Tee mache... Genau so weni, wie das heisse Kumquat-Saft mit gsauzne Zwätschge fein isch... ;)
Z schönschte am Ganze isch aber gsi, dases hie zwar richtig chaut isch gsi, jedoch fasch nüt grägnet het. Ok, d Sunne het ou nid grad gschune, aber das isch jo egau, wenns wenigschtens troche isch. Und dank däm, dases Nachts so chaut worde isch, hei mir de ou wunderbar gschlofe.
In Da Lat gits es paar Sache zum gse, unger angerem ou es Stückli Heimat... Äs Gondeli "Made in Switzerland" wo über Piniewäuder (i gloube ömu dases Pinie si) schwebt. Hach isch das schön gsi, scho dr Ton vom Gondeli hetmi a dehei erinneret, nur dr Schnee het gfäut und usse ade Gondeli hets kei Snowboardhauterig gä :) Z Gondeli fahrt de ine chline Ort amene See mitere wunderschöne Tämpualag wo ou hüt no viu Mönche drin läbe.
Es witers Erläbnis isch z Crazy House, äs Huus wo völlig abdräit isch, aber richtig schön Märlihaft würkt. Ok, ei Egge sisi grad am boue und me gset, wie das ganze konstruiert isch... Sicher gset angers us... aber Sicherheit isch eh überbewärtet in Asie ;) Auso eifach drüber hinwäg luege und gniesse, isch d Devise hie ;) Ansonschte isch z Crazy House (wo unger angerem ou es Hotel isch), relativ schwär z beschribe, am beschte eifach d Föteli aluege.
Eigentlech hani de ou unbedingt no mit de Schwan-Pedalos wöue ufem See go fahre. Die gset me geng ide Fiume und jetz ha ig doch ou mou i so eim wöue hocke. Aber leider het dr Vermieter a däm Tag frei gha (d Nachbare hei üs nur chönne säge, daser nid zur Arbeit erschine isch, auso heig är sich äuä frei gno) und mir hei nid chönne go. I hoffe fescht, mir finge no amene angere Ort es paar!



0 Kommentare

Fr

12

Dez

2014

Nha Trang

Vo Hoi An simer de mitem Sleeperbus witer nach Da Lat, wobi mir no es paar Stung Ufenthaut in Nha Trang gha hei, enere Touristestadt diräkt am Meer, mit viele Luxus-Russe, Krokodilläder- und Perleshops und emene Poschtchartetougleche Beach. Dä Beach hätte mir natürlech grad in Beschlag gno, wenn d Sunne ou nur für ei Sekunde wär use cho. Aber nei, es het säubverständlech fasch durchgehend grägnet und derzue isch z Meer a däm Tag so tosend gsi, das bade mit Sicherheit kei gueti Option gsi wär. Aber jo, ohni Prada-Bikini und Louis Vitton Badtüechli hättemer hie äuä eh kei gueti Figur gmacht ;)
0 Kommentare

Fr

12

Dez

2014

Hoi An

Z Wätter wot und wot nid besser wärde, egau wie fescht mir ou druf hoffe, es rägnet so zimlech unungerbroche. Es isch zwar jetz wider um die 20 Grad warm, aber mit Duurräge isches eifach nid so cool zum go Zügs z erkunde. Mir wäre gärn mou no i nöchglägnig Nationalpark oder mit de Velo zum Strand, aber kei Chance, es het abegläärt wie blöd. Auso heimer de haut nur chli Hoi An säuber undd Coffeeshops gse. Hoi An isch ächt härzig und het ä wunderschöni Autstadt, es lohnt sech, das go z bsueche (sogar bi Räge). D Fahrt vo Hue dört häre duuret ca. 3 Stung und Stross geit zersch chli dürt Bärge, bevor si de as Meer chunt. Churz vor Hoi An isch no ä grösseri Stadt wo sehr Luxuriös würkt, mir hei die (und die schöni Brügg) aber nur vom Bus us chönne aluege. Was aber sehr erschreckend isch gsi, isch d Gägend um d Stadt ume. Me fahrt uf dr Stross am Meer entlang und het uf dr einte Strossesitte d Luxushotels und Resorts mit diräkter Meeresabindig und uf dr angere Sitte nur 20m vor Stross entfernt z Ghetto vo Vietnam. Duet weh, weme das so mues aluege und i froge mi, wie öpper das Luxushotel cha gniesse, wener weiss, das es paar Meter witer die Iheimische i Blächhüttli mit Plastikplane wohne. I chönnts nid.
0 Kommentare

Di

09

Dez

2014

Hue

Nachere 14 stündige Fahrt mitem Sleeper-Bus simer in Hue acho. Dr Sleeperbus isch ä super Sach... vorusgsetzt me isch nid grösser aus 165cm, het ä maximali Schuegrössi vo 36 und isch nid schwerer aus 55 Kilo. Denn genau für die Grössi si d Sleeper-Bus usgrichtet und genau die Persone erläbe die Sitz/Liegeplätz bestimmt aus Komfortabu. I bi es bitzi grösser gsi, ha es bitzi grösseri Füess und bi ou es bitzi schwerer und ja, es isch nüm 100% komfortabu gsi, aber immerhin no einigermasse bequem. Öppis, wo dä Typ 3 Sitzreihe hingerdra nid het chönne teile, denn är isch 186 gross gsi, schetzigswiis 110 Kilo und het öppe ä Schuegrössi 46 gha..., somit hei sini Füess nid mou me Asatzwiis id Nische für d Füess passt, si Körpermasse nüm zwüsche d Armlähne und si Chopf het öppe 15 cm über d Chopflähne usegluegt. Am ändi vor Fahrt het dä auso aus angere aus erfrüscht dri gse :/
Wenn me aber einigermasse die passende Körperproportione het, denn isch dr Sleeper-Bus es super Fortbewegigsmittu und 14 Stung chöme eim gar nid wie 14 Stung vor. Derzue chunt, dasme im Bus Wlan het und dämentsprächend während dr Fahrt aues das cha mache, was süsch geng chli z churz chunt (zum Bispiu längi Blogbrichte schribe :p)
Hue isch ä chlineri zimlech verschlofni aber würklech härzigi Stadt. Z Highlight vo dere Stadt isch Imperial City, ä urauti Stadt ir Stadt, wo früecher die riiche und "schöne" gläbt hei. Hüt isch die "Stadt"  äs lebändigs Museum. Das mir so schlächts Wätter gha hei, isch uf die einti Sitte super gsi, denn normalerwiis isch die Imperial City komplett überloffe mit Tourischte, wo mir gange si, simer aber so zimlech elei gsi. Uf die angeri Sitte isches Mischt, wüu ä "Stadt" z erkunde, wenn me gfrorni Füess het und eim dr Wind um d Ohre pfifft, isch nid ganz so luschtig. Dämentsprächend hei mir üse Rundgang de ou chli schneuer gmacht aus normau und würklech nur so die wichtigschte Eggeli agluegt. Aschliessend heimer üs ines härzigs Wiehnächtlech gschmückts Kafi zrüg zoge und hei heisse Tee gnosse ;) I mues aber säge, das mi das Wätter im Momänt gar nid soooo extrem stört, denn i liebe d Vorwiehnachtszit und das Wätter passt perfekt zu au dene gschmückte Schoufänschter und Beizli hie, da chöme grad chli Heimatgfüeu uf. Mir hei sogar scho es Beizli gfunge wo Hot Wine abotte het und ä Shop mit Lindt- Samichlöis. so hani jetz ou es paar Täg Vorwiehnachtsstimmig. Jedefaus hani mi de grad mit Wiehnachtsschoggi ideckt und ha am Obe im Hotelzimmer ä Wiehnachtsfilm übers Internet gluegt, vou heimelig. Nur mini Kuscheldecki het no gfäut, denn wärs perfekt gsi ;) Me mues das wome het eifach nur positiv gse und cha ou ä chaute Rägetag eim ds Reise nid vermiese ;)
D Dee hingäge gset das nid so positiv, si hasst d Wiehnachtszit und das eim denn aui wei Zügs verchoufe und cha ou mini Wiehnachtseuphorie nid so ganz verstoh. Aber mou abwarte, bis am Ändi vo üsere gmeinsame Reis hani se de bestimmt ouno sowit, das si d Wiehnachtszit liebt :p
Jetz gönni mer de grad no ä Hot-Stone-Massage und ä Fuessmassage und denn bini de für d Witerreis nach Hoi An morn grüschtet ;)




0 Kommentare

Mo

08

Dez

2014

Halong Bay

Wenn me scho in Hanoi isch und im Norde vo Vietnam, denn darf natürlech ä Bsuech vor Halong Bay nid fähle. D Halong Bay isch a Bucht im Meer, wo lut üsem Guide us 1969 chlinere und grössere Kalksteiinsle besteit und wo sit 1994 zum Unesco Welterbe ghört.  Die meischte Insle si sehr dicht mit Rägewaud bewachse und ä Grossteil vode Insle het inne drinne Hohlrüüm mit Kalksteihöhlene, Stalagmite und Stalagtite. Anschinend isch unger Wasser es riesigs Kalksteiplateau, wo au die Insle druffe befeschtigt si. Jede Tag fahre hunderti vo Boot mit Tourischte i die Bucht, je nach Art vor Tour nur für es paar Stung, oder aber für mehreri Täg. D Halong Bay isch trotz dene viele Schiff und Tourischte es must see, öppis wome uf kei Fau darf verpasse. Und wie d Joli richtig gseit het, ir Bucht verlouft sech das mit de Boot ganz schnäu und me isch uf sim Boot i sire eigete chline Wäut und nimmt die Boot rundume gar nid so wohr.
I wär sehr gärn zwöi Nächt ir Bucht blibe, da d Wätterprognose aber chaut und und räge vorhärgseit hei, hei d Dee und ig üs de uf ei Nacht beschränkt. Und das isch ou guet gsi so, denn es isch würklech grusigs Wätter gsi. Dr Halong Bay het das aber kei Abbruch do, denn ou bi Räge isch si wunderschön und het sogar chli öppis mystischs. Üsi Fahrt het de ou die klassische Sache beinhaltet, sprich ä Bsuech ir Surprising Cave, ä Kayakfahrt um d Inseli (oder gäge ufpriis ou dürne Tunnel binere Insle, Squid-Fische (Squid si so chlini Tintefischli) und ä Chochkurs wosi eim zeige, wime vietnamesischi Früehligsroue macht. Mir hei super Lüt ufem Boot gha und dämentsprächend so richtig dr Plousch, ou wenns würklech mega chaut gsi isch. Dr wunderschön Sunneungergang ir Bucht kenni leider nur vo Joli ihrne Biuder, in ächt heimer leider keine gse. Was üs aber überrascht het, isch, dass d Luft zwar ischchaut isch gsi, z Wasser aber nach wie vor ä Tämperatur vo ca. 27 Grad gha het, auso perfekt zum bade. Nur z usecho nachem schwümme het nid so gfägt :/
0 Kommentare

Mo

08

Dez

2014

Hanoi

Hüt simer am spötere Obe in Hanoi glandet und somit ou inere komplett nöiie ufregende Wäut. Mir hei ungerwägs viu Reisendi troffe wo gseit hei, si heige mit Vietnam nüt chönne afo, ihne sigi das viu z lut und z wiud und z gschäftig gsi und d Lüt sige nid fründlech gsi. I cha die Meinig nid teile, denn ig bi absolut häppy, das hie so ganz ä angeri Atmosphäre herrscht und aues wider so ganz angers isch. I ha das richtig bruucht ;) I cha aber die Lüt verstoh wo das gseit het, denn vom relaxte Läbensstil wo die angere Länder gha hei, isch hie wahrlech nüt z gse. Viumeh het mi Hanoi a Europa erinneret.  Hie herrscht ganz viu Verkehr, es isch lut, es het ganz viu Belüchtige (ide angere Länder isch Strossebelüchtig fasch oder gar nid vorhande gsi), überau si Lüt ungerwägs und es louft so richtig öppis. So chli a la Langstross, aber haut über die ganzi Stadt verteilt. Vou mis Ding!
Hanoi isch de ou riesig, d Fahrt vom Flughafe zu üsem Hostel im Stadtzäntrum het ä gueti Stung duuret, wovon die ganzi Fahrt dürt Stadt gfüehrt het und zwar uf Outostrosse. Nid z vergliche mit au dene angere Stedli womer nach Bangkok si gsi.

Ou d Lüt si hie ganz angers. Uf die einti Art zwar viu ufdringlecher aus angerne Orte, aber uf die angeri Art gspürt me ou d Verziflig vo dene Lüt und wie wichtig dases für si isch, das si chöi Gäut verdiene. Ou wenn Hanoi ufe erscht Blick so würkt, aus würds de Lüt hie besser go aus dene in Laos oder Thailand, so merkt me ufe zwöit Blick, das vermuetlech genau z Gägeteil dr Fau isch. Hie isch vermuetlech eifach dr Ungerschied zwüsche Arm und Riich viu grösser.
Und nid z letscht, het üs hie ou z Wätter völlig überrascht, denn ou das isch hie ganz angers aus ide angere Länder... im negative Sinn. Vo fasch 30 Grad und Sunne simer ä Stung spöter im iischchaute verrägnete Hanoi glandet. Währends im Süde vo Vietnam nur Räge und Trochezit git, herrscht im Norde es Vierjohresklima... und mir si diräkt im Winter glandet. Winter heisst, das d Luft ca. 15 Grad isch, dases sehr viu rägnet und bewölkt isch und das aui so umeloufe, wie wenns -3 Grad wär. Aui ussert mir, denn mir hei überhoupt nid mit so Tämperature grächnet und hei zimlech heftig gfrore. Mir hei ou nid so würklech warmi Chleider derbi, sprich keini würklech guete länge Hose (zumindescht ig nid, d Dee het no es paar Jeans füre Rückflug im Gepäck gha), keini Jagge und nur eis paar Socke. Brrrrrr!
Naja, derfür würkt hie d Wiehnachtsdeko wo überau ufghänkt isch, sehr autentisch.

Am erschte Tag simer de is Hoa Lo Gfängnis, das isch es zimlech bekannts Gfängnis, wüu hie aui politische Gfange gsi si. Ir Schueu im Gschichtsungerricht het me jo dr Vietnamchrieg scho düregno, aber denn isches haut eifach notwändigs Übu gsi. Wenn me jetz aber hie isch und i däm Gfängnisgebäude steit, die originale Gfängniszäue, d Chleider, z Gschirr, etc. gset, denn isch das doch ganz öppis angers. Plötzlech chame sich öppis unger däm Chrieg vorsteue, me chasech vorsteue, wie schlächts de Lüt hie gange isch und was die aues müesse düregmacht ha. Was z Land mues düregmacht ha. Es isch uf die enti Art beängschtigend, uf die angeri aber ou sehr spannend und interessant und es weckt z Bedürfnis, sich meh mit däm Chrieg und däm Land z befasse.
Was üs aber ou ufgfaue isch (nid nur hie, sondern när ouno a witere Orte) isch, dass das Thema immer sehr sachlech abghandlet wird und das nie irgendwo irgend äs Wort drüber verlore wird, wis em Vouk derbi gange isch oder wis däm jetz geit. Das Thema wird irgendwie todgschwige, verdrängt, was ou immer. Me wot anschinend nid drüber rede und me wot ou nid, dases ussestehendi mitbechöme. Und es isch schwirig z säge, öb das z Volk so wot, oder d Regierig.

Mir si de aschliessend no is Women Museum und hei dänkt, dasmer de hie vilicht chli meh drüber erfahre. Aber ou hie Fählazeig. Me gset zwar, weli Roue d Frou i dene verschidene Völkerstämm het, was ihri Ufgabe si und wie ä Hochzit, Geburt, etc. von Statte geit, aber ou hie erfahrt me nüt übere Stang vor Frou im hütige Zitauter. Äs git einzig ei 6 Minütige Fium wo es paar Froue us Hanoi und dene ihres herte Läbe portraitiert und wo ufzeigt, wieso si in Hanoi si. Us däm Fium use gspürt me, dases no immer sehr sehr viu würklech Armi Lüt mues gä, wo es würklech herts und schlimms Läbe hei und wo nur knapp chöi überläbe und ihri Familie dürebringe. Portrait wo das spiegle, wo mir dänke und gspüre, wenn die Froue üs uf dr Stross öppis wei verchoufe.

Mir hei de ouno z Water Puppet Theatre bsuecht, das isch es wäutbekannts chlises Theater, wo no die urauti Form vo Theater. Ä chline Teich mit Wasser dient aus Bühni. D Rückwand besteit us Bambusvorhäng und dört derhinger stöh d Persone wo d Wasserpuppe stüüre im Wasser.  Me chas chli mit normalem Puppetheater vergliche, nur dases haut im Wasser stattfindet, was däm ganze grad ganz ä angeri Atmosphäre git. Näb dr "Bühne" isch es chlises Orcheschter, wo das ganze live musikalisch begleitet. Da mir nid vietnamesisch chöi, heimer leider nid aui vo dene Gschichte verstange, aber ou so isches zum luege wunderschön gsi. Es wärde ganz vieli verschideni Churzgschichte verzeut, unger angerem die, wo ä goldige Schildchrott am böse chinesisch König z Schwärt chlaut unds am Gott zrüg bringt. Es wärde aber ou autäglechi Szene dargsteut, wie z Läbe vomene Farmer, emne Fischer, etc.
Für üs isches nach dene viele doch zum teil sehr betrüebleche Idrück vo däm Tag ä gwunnigi Abwächslig gsi und het derfür gsorgt, das mir dä Tag mitemene positive Gfüeu hei chönne abschliesse, ou wenn me das wome vorhär gse het, natürlech nid eifach vergisst und eim das no witer wird begleite.




0 Kommentare