Fr

06

Feb

2015

Tasmanien (zwöiti Heufti)

So, ändlech fingi mou wider Zit und unlimitierts guets Internet, zum dr Blog chönne uf Vordermaa z bringe und nochli meh zu Tasmanie z schribe.
Auso gstartet simer in Hobart und denn ar Küschte no zersch uf Port Arthur und denn witer uf Triabunna gfahre. Eigentlech heimer dört no ä Insle wöue go bsueche, aber da z Wätter nid mitgmacht het, heimer das de losi. Denn isches i Freycient Nationalpark gange, womer ufe Mount Amos ufegloffe si, wobi loufe dr fautsch Usdruck isch, mir si klätteret und gschlitteret. Denn vo dört isches ar Küschte no ufe bis uf St. Helens und dr Bay of Fire gange. D Bay of Fire isch bekannt für ihri wunderschöne wisse Sandstränd und die Füürrote Steine. Denn vo dört simer witer uf Launceston mit Haut im Mount Williams Nationalpark und em Cataract Walk in Launceston. Denn ufe bis wider as Meer und übere nach Bicheno go luege wie die chlinschte Pinguine vor Wäut vom Wasser zu ihre Höhlene am Strand watschle. Denn vo dört us simer de i Cradle Mountain Nationalpark, em bekanntischte vo Tasmanie. Jo und de si die 10 Täg ou scho ume gsi und es isch zrüg nach Hobart gange.
Tasmanie isch wunderschön und sehr viusittig. Fasch hinger jedere Kurve gset d Natur wider angers us und d Farbe vor Natur si unheimlech chräftig, wäuts schön. Derfür isches aber ou einiges cheuter und cha vorauem Hochland ou schnäu mou um die 0 Grad chaut wärde. I bi auso froh gsi, das mir dr Yann es paar längi Hose und ä Jagge brocht het ;)
Tasmanie isch aber nid nur wäge sire prachtvoue Natur populär, sondern vorauem ou wäge sinere Tierwäut. Tier wo in Oustralie eigentlech sehr säute si, si in Tasmanie wit verbreitet. So zum Bispiu z Wombat und z Ekidna und ou z Schnabutier (letschteres hani leider nie gse gha, während angeri das öppe 10 Mou gse hei :(()
Und nid z letscht isch Tasmanie eifach perfekt zum wandere, es het soo viu Nationalpärk und überau isch d Natur wider komplett angers, eifach troumhaft.
0 Kommentare

Fr

16

Jan

2015

Tasmanien (erschti Heufti)

Häppy und zfride, aber todmüed bini am 13. Januar in Tasmanie glandet und bi vo däm ganze "Luxus" no fasch chli überforderet. Isch scho luschtig, wime plötzlech die chline Sache nüm aus Säubverständlechkeit aluegt. So hani mi zum Bispiu wines chlises Ching überne guet funktionierendi Duschi gfröit. Eini wos ä Warmwasserhahne het und tatsächlech warms Wasser usechunt. Und es chunt augemein so viu Wasser use, dasme nüm zwüsche de einzelne chline Strahl mues hin und här renne, me cha eifach a eim Ort blibe stoh und wird überau nass ;) Aber ou ä richtige Supermarkt hani in Asie nie gha, z höchschte der Gefühle isch ä 7-Eleven gsi, sprich so ä Art Coop Pronto und ou das heimer nur in Thailand und einisch in Laos gha. Süsch sis meh oder weniger aues Outogarage-Verchoufssteue gsi. Es git wider Verkehrsregle und (leider) ou wider Verbotstafele. D Sache wome chouft entspräche wider Sicherheitsnorme und es git fixi Priise und Öffnigszite. Vorauem d Öffnigszite überfordere mi aber no, das bini mir nüm gwöhnt, das öppis zunere bestimmte Zit nümme offe het ;)

Während in Asie vorauem d Lüt, d Kultur, d Läbensart und die ganze absurde und luschtige Sache wo die hei spannend si gsi, so überzügt Tasmanie vorauem mit landschaftleche Highlights. D Natur isch sehr abwächsligsriich, si het unheimlich viu verschideni und sehr intensivi Farbe, spektakuläri Klippe und wunderschöni Bärge, Stränd und Gras-/Waldlandschafte. Und natürlech nid z vergässe die viele Tier. Eigentlech hätt Asie Tiermässig jo viu meh z biete, aber me het haut fasch keini Müglechkeit, die Tier dört z gse. Hie in Oustralie hingäge louft eim das Züg grad säuber vor d Kamera. So heimer scho bim erschte 2h-Spaziergang es Ekidna und zwöi Pademelons gse und so riiiiese Ameise, die si nid übertribe übernä Zentimeter läng gsi!
Schlange und Spinele heimer aber no keini gse (gottseidank). 
Eigentlech hani mir jo ou gschwore gha, das ig sicher nid uf schmale Wägli gange go wandere und um Büsch ume und so, wüu ig jo Angscht ha vo dene Viechli. Aber wie chönnts ou angers si, scho am zwöit Tag simer ufene Bärg ufekragslet, zwüsche Feuse  und über grossi Steine drüber, dür Steppegras, Glungge und uf schmale Trampelpfad dür d Büsch. D Angscht isch auso no geng presänt, aber d Nöigier überwiegt äbe meischtens glich :/ Naja und dehei vergisst me das mit de Spinele de irgendwie relativ schnäu, wüu haut aus so zivilisiert und so schwizerisch usgset, me het gar nüm z Gfüeu, es chönn eim öppis passiere. In Asie het me eher no so es komischs Gfüeu gha, wüu haut aues chli lottriger gsi isch.

0 Kommentare