Do

04

Dez

2014

Vientiane

Über Vientiane gits nid sooo viu spannends z verzeue, es isch ä ganz normali Stadt. Si isch nid speziell dräckig und ou nid speziell suber, si het weder sehr verlottereti no sehr schöni Gebäude und aues isch eifach so irgendwie Durchschnitt. Z schönschte a Vientiane isch dr River und dr Wäg entlang em River. Und am Obe dr Nachtmarkt, wo genau dört entlang füehrt. Ansonschte muesme Vientiane jetz nid unbedingt gse ha und es git ou würklech nüt spannends über die Zit i dere Stadt z verzeue. I dänke es isch eifach ä guete Ort, wenn me mou ä Tag wot usspanne, wüu me nid z Gfüeu mues ha, me chönnt hie öppis verpasse ;)

0 Kommentare

Di

02

Dez

2014

Vang Vieng

Vang Vieng isch ä wunderschöne chline Ort mits ide Hügle/Bärge im Norde vo Laos. Dä Ort isch uf aui Sitte relativ schlächt erschlosse und het drum langi Zit kei Ufmerksamkeit uf sich zoge und isch anschinend es zimlech verschlofnigs Dörfli gsi. Irgendwenn si es paar Arbeiter dört häre versetzt worde und wüus dene so längwilig isch gsi, heisi agfange, uf Gummiringe dr Fluss abe z fahre. Und wie das so isch, irgendwenn isch us däm "chli dr Fluss abefahre" ä riese Tourischteattraktion worde, s hei ganz viu Bars entlang dere Strecki eröffnet und wasme so ghört, mues dä Ort bis vor 3 Johr emene chline Ballermann gliche ha... sehr zum Ärger vode Bewohner. Vor ca. 3 Johr isches de so usgartet, dass innert es paar Mönet über 40 Tourischte gstorbe si, wüu si starch alkoholisiert und unger Droge die Tour gmacht hei und denn ertrunke si. Aschliessend het me die Tour de zwöi Johr lang verbotte, bevor mes jetz wider göffnet het, dasmou aber unger viu strengere Bedingige. Dämentsprächend hets jetz wider viu meh Tourischte, es erinneret aber nüm gross a Ballermann, eher ane ganz normale Touriort. Entlang dr Tube-Strecki hets grad no vier Bars und am Obe gits no zwe Orte, wome chli dusse cha fiire, wovon beidi spötischtens am 23.30 Uhr zue düe. 
Mir säuber hei d Tube-Tour nid gmacht, stattdesse simer go Kayak fahre, denn d Natur entlang em River isch absolut fantastisch. Vang Vieng isch rundume vo Karststeigebirge und Kalksteine umgä und es het ou u viu Kalksteihöhline hie. Rund um die Kalksteine isch dickschte Rägewaud und aues isch Grüen und bunt. Dr einzig Nachteil vo Vang Vieng isch, dasme dä Ort nur mitemene Bus (meischtens Minibus) cha erreiche und das isch auso ächt keis Zuckerschläcke! I bi jo würklech aues angere aus heiku, aber bi dere 6 stündige Busfahrt vo Luang Prabang nach Vang Vieng bi sogar ig irgendwenn froh gsi, dasmer ändlech am Ziel hei chönne usstige. Dr Minibus isch zwar imene verhäutnismässig guete Zuestang gsi, das nützt eim aber nid viu, wenn dr Fahrer das nid isch. Die gsamti Strecki füehrt uf relativ schmale und sehr kurveriiche Strosse dür d Hügle (analog ere Schwizer Bärgstross, nur das d Belagsqualität definitiv ä angeri isch). Die viele Schlaglöcher und dr dick Rägewaud wo diräkt näbe dr Stross afot macht d Fahrbedingige nid grad eifacher. Das wär natürlech aues keis Problem, weme uf dere Strecki schön brav 40 würd fahre, aber denn würd die Fahrt jo viu z lang duure. Auso fahrt me konsequänt 80-100, egau öbme um die nöchschti Kurve gset oder nid und egau öbs häu oder dunku isch. Scho nach dr erschte Stung heimer es Huehn ufem gwüsse gha, wo dummerwiis uf dr Stross gstange isch. 3 Stung spöter het sech ä agfahrne Velofahrer derzue gsellt, wo chli z wit ir Mitti vor Stross gfahre isch. Und ä witeri Stung spöter het üse Fahrer leider ä grosse Stei überseh. Dä Stei het de irgendöppis ar Achse zerstört (i ha gar nid so gnau wöue wüsse was) und het derzue gfüehrt, dasmer im Schrittämpo zum nöchschte Hüsli hei müesse hötterle. Dört hetme de, ganz nach asiatischem Grundsatz "Chläbband cha aues" üses Outo "gflickt". Die nöchschte zwöi Kilometer isch üse Fahrer de einigermasse langsam gfahre zum "teschte" öb z Chläbband het und wo das funktioniert het, ischer wider mit 80-100 witergheizt.
Aui im Bus hei zwar so do, aus würde si das ganze entspannt näh, schliesslech weiss jo jede, dasmes eh nid cha ändere, aber innerlech isches gloub aune gliich gange, mir hei eifach nur ghofft, dasmer einigermasse heil in Vang Vieng wärde acho... Wasmer de Gottseidank irgendwenn ou si ;)
D Jenny, ä Östricherin woni in Chiang Mai ha lehre kenne, het de es paar Täg spöter gschribe, das si d Fahrt es paar Täg spöter gmacht heig und si sech bi dere wiude Fahrt so oft dr Chopf agschlage heig, das si när zwöi Täg Chopfweh gha heig dervo. Do si mir jo fasch no besser derbi wäg cho (ok, z Huehn und dr Velofahrer würde do jetz äuä öppis angers säge). I ha de die Fahrt eifach aus biuige Adrenalinkick abghöglet.
In Vang Vieng simer eini vode Kalksteihöhlene go bsueche. Es het hie unzähligi, söttigi wo richtigi Gehwägli und Belüchtig dinne hei, angeri wome mit dr Taschelampe säuber drinne cha go umechlättere. Mi hätt jo z säuber umechlättere greizt, aber zum einte heimer nid so ä gueti Taschelampe derbi gha, zum angere het mini Schlangephopie däm ganze chli ä Strich dür d Rächnig gmacht. Usserdäm isch das mitem säuber umechlättere und erkunde i dene Länder immer chli mit Vorsicht z gniesse. Denn ir CH si töifi Abgründ, rütschendi Feuse, etc. immer relativ guet kennzeichnet... In Laos isch das öppis völlig überbewärtets. Glücklecherwiis hei aber fasch aui angere z Abentüür gsuecht und mir hei die schöni belüchteti Höhli sozsäge für üs elei gha, genau so wie ou dr chli natürlech Pool mit Zuegang zunere Höhli. Mir hei de am Obe no zwe Dütschi troffe und die hei üs verzeut, das si inere Höhli sige go umechlättere und tatsächlech ere Schlange begägnet si. Ä witere Östricher het gseit, är heig das mitem Chlättere relativ schnäu ufgä, woner plötzlech ir Höhle voremene töife Abgrund gstange sig. Auso isch üsi Entscheidig sicher nid die schlechtischti gsi.
Am nöchschte Tag hani eigentlech mitem Kayak vo Vang Vieng nach Vientiane wöue fahre, aber wüu dr Wasserstang z töif gsi isch, isch das nid müglech gsi. Auso si d Dee und ig chli witer Obe go Kayak fahre, was ächt gfägt het und i bi de aschliessend mitemene Lokal-Minibus nach Vientiane gfahre. D Dee isch ersch am Tag druf am Morge cho. Dr Lokalbus isch genau so gsi, wime sech das aube vorsteut wenn me so Heftli list. Är het 10 Plätz gha, het aber Platz für 16 Persone botte, inklusive auem Gepäck (und ig mit mim Rucksack ha definitiv no am wenigschte Gepäck gha). Aber irgendwie isch ou das gange ;) Z grössere Problem isch gsi, das dr Pick-Up-Service ä Stung z früe cho isch und ig kei Zit me ha gha, zum mis Röckli gäge Hose usztusche. Und das dr Pick-Up-Service nid es Outo, sondern ä Roller gsi isch. Sehr schlächti Kombination, vorauem wenn me imene Land isch, womes nid gärn gset, wenn me d Chnöi nid bedeckt het. I hami de dämentsprächend ou zimlech unwohl gfüeut und bi ou dämentsprächend agstarrt worde. Kei Ahnig wie angeri seeleruhig i däm Outfit wuchelang chöi umereise, mir wär das zu unagnähm und respäktlos. Aber das mues gloub jede für sich entscheide.






0 Kommentare

So

30

Nov

2014

Luang Prabang

Ir Zwüschezit simer in Laos acho und gniesse z wunderschöne Luang Prabang. Isch scho krass, wie ungerschidlech die Länder si, vorauem was d Läbensarte und Kultur betrifft.
Laos isch zimlech starch vo Frankriich prägt und das sticht überau use. D Hüser hei aui chli ä französische Touch, die eutere Lüt rede aui relativ guet französisch, es git überau früsches Baguette und Crepes und d Lüt si sehr starch druf fixiert, aues schön z gstaute. So hani in Laos zum erschte mou dr Idruck gha, das d Lüt würklech wärt uf Gmüetlechkeit und Schönheit lege. So hei d Hüser aui ä schöni Terrasse, d Restaurant si so bouet, dasme immer ä wunderbare Usblick het und glichzitig isch ou aues immer sehr stylisch dekoriert und igrichtet. In Thailand hani das nur a würkleche Tourischteorte erläbt und in Myanmar gar niene. In Laos aber hani das ou völlig absits vo Luang Prabang gse.
Scho d Aareis mitem Flüger isch es Highlight gsi. Luang Prabang ligt inmitte vo Bärge (oder Hügle oder wime das ou wot nenne, denn die wo us flache Länder chöme, finge, es sige riese Bärge, die wo us bärgige Gägende chöme, finge, es sige grossi Hügle) und dr Flughafe isch imene schmale Tau. Me flügt auso zum lande ganz nöch ade Bärge verbi und isch glichzitig diräkt überem Mekongfluss, troumhaft.
Die ganze Bärge si komplett mit Rägewaud bedeckt und es isch eifach überau grüen. Luang Prabang isch ä chlini Stadt ufere schmale Haubinsle, uf dr einte Sitte isch dr Nam Khan River, ä Zuefluss zum Mekong und uf dr angere Sitte isch dr Mekong. Ir Mitti vo Luang Prabang isch ä bewaldete Hügu mitemene Tämpu obe druffe. Für Rägewaud-Fans eifach ä Troum. Me cha Luang Prabang öppe mit dr Grössi vo Lyss oder Dietlike vergliche. Z Läbe geit schön ruhig und me het z Gfüeu, das hie niemer würklech gstresst isch.

Mir hei de ei Tag ä Usflug zum Kuang-Si-Waterfall gmacht, em schönschte Wasserfau woni jemous gse ha. Me cha mehreri Hundert Meter am Fluss entlang ufeloufe und me fingt ständig e angeri Art vo Wasserfau. Mou sis chlini Plateau wo z Wasser drüber fliesst, mou geit dr Wasserfau über grösseri Stägetritte, mou fliesst är um Böim ume und mou stürzt är sech öppe 40 Meter überne Klippe ab. Dr ganz Fluss isch vo Kalkstei überzoge und z Wasser het ä kitschig grüeni Farb. Und aus ob das nid scho Märlihaft gnue wär, isch dä Fluss ouno inmitte vo dickem Rägewaud. I ha immer gmeint, die Poschtchartebiudli woni dervo gse ha sige Bschiss, aber sit ig dört bi gsi weisi, dases ächt isch. Wär jemous in Laos isch und gärn Wasserfäu het, dä mues dä unbedingt!!! bsueche. Grad ungerhaub vom Wasserfau gits ouno es Schutzzäntrum für Malaiebäre. D Bäre dört si söttigi wo us Gfangeschaft oder us de Häng vode Wiuderer befreit worde si und dört jetz ä würklech schöne Läbesobe chöi verbringe. Sisch scho krass zum gse, was die Bäre für Sache hinger sech hei. Umso schöner, dases so Plätz wie das Bärezäntrum git. Weniger schön isch dr Rückwäg gsi, do hets ä Stop imene chline Dorf gä, wome churz het chönne usstige. Es het i däm Dorf genau ei teerete Fuesswäg gä und a däm Wäg entlang si aus Ständ gsi, wo Ching säubergmachti Sache verchouft hei. Und es isch no tragischer zum aluege gsi, wie viu Lüt a söttige Orte öppis choufe und do dermit d Chinderarbeit ou no ungerstütze.

Dr zwöit Tag heimer Mountain Bikes gmietet und si go d Gägend erkunde. Mir si am Nam Khan entlang gfahre, si arme Arbeitselefante begägnet und hei ä Wasserfau gsuecht und nid gfunge. Würklech wit simer aber nid cho, denn ig und d Dee hei irgendwie chli ä angeri Uffassig vo Bärge gha... Während ig mi drüber gfröit ha, das hie z Bike so easy isch, wüus nur so liecht ufe und abe geit, het d Dee wöue stärbe, wüus soooo höch ufe und abe gange isch 😂 Tja, d Definition vo Bärge isch haut für jede chli ä angeri ;) 
Aber uf jede Fau heimer mega viu Spass gha und es het so richtig gfägt (sogar d Dee het am Schluss gfunge es sigi cool gsi und dr Muskukater wärt ;))







0 Kommentare