Di

23

Dez

2014

Siem Reap mit Angkor Wat

mehr lesen 0 Kommentare

Di

23

Dez

2014

Battambang

Ufem Wäg nach Siem Reap heimer no ä Umwäg über Battambang gmacht, wüu mir mitem Boot dürt Flüss und übere Tonle Sap See hei wöue. Und d Joli het üs de ouno nöch gleit, unbedingt ä Fahrt mitem aute Bamboo Train z mache. I ha das scho uf Biudli vo ihre gse gha und hamer so einigermasse öppis chönne drunger vorsteue, d Dee het aber kei Ahnig gha was das isch. Si het de gfunge, bevor si mitchöm söu ig ihre zersch mou erkläre was das sigi. Nun ja, das isch uf Dütsch scho schwirig zum das öpperem erkläre, uf änglisch isches no viu komplizierter. Nach minere Erzählig isch si dervo usgange, dass das äs Train uf Bambus-Schiene isch... Fasch korrekt :p
Mir sis de auso go usprobiere und d Joli het nid gloge, äs het würklech mega gfägt. Z Bambootrain isch früecher in ganz Kambodscha verbreitet gsi und me het das gnutzt, zum Ware transportiere. Hüt ischs dür angeri Sache ersetzt worde und das hie isch no so eis vode letschte nostalgische Überblibsu. Da d Gleis dringend renovationsbedürftig si (wime uf de Föteli unschwär cha erkenne), wirds ou das Train äuä nüm lang gä, es fäut eifach z Gäut zum's chönne renoviere.
Mir si de auso öppe 20 Minute dür d Gägend graset, hei bi Gägeverkehr das ganze Ding demontiert und de wider uf Gleis gsetzt und si witer düset. Und das trotz de zimlech schiefe Gleis nid grad langsam... :)
Am Ändi hets so äs chlises Dorf mit Souvenirstäng, wosi eim aues müglech und unmügleche wei verchoufe und de geits de när ou scho wider die ganzi Strecki zrüg. Mir si die letschte Gescht a däm Tag gsi und wo mir zrüg gfahre si, isches scho dunku gsi. Die im Dorf hei gmeint, si heige nüm mit üs grächnet, normalerwis chömi die letschte Gescht ä Stung früecher. Jedefaus het das luschtige Train natürlech keini Lampe und es loufe überau freii Chüe, Söi, Hüehner und weis dr Gugger was aues ume. Und natürlech rächne ou d Fuessgänger um die Zit nüm dermit, das se äs Train chönnt übere Huufe fahre. Auso hei d Dee und ig üs mit üsne Handy-Taschelampe vorne positioniert und so simer i gmüetlechem Tämpo heighötterlet. Jedesmou wemer irgend ä Schatte usgmacht hei, het üse Fahrer aghaute und isch go luege wases isch, bevors wider witer gange isch, mir hei öppe dopplet so lang gha wie normau :) Und i bi natürlech öppe 20 Tod gstorbe mit minere Schlangephobie!
Dä Tuk Tuk Fahrer womer in Battambang gha hei, isch ä eutere Maa gsi, wo in Battambang ugfwachse isch und wo extrem stolz uf sini Stadt isch. Dämentsprächend hetter für aues immer Umwäge gno, wüu är üs unbedingt no öppis het wöue cho zeige und verzeue. Vou härzig. Ou vo ihm heimer wider viu übers Land und d Lüt glehrt, was sehr spannend isch gsi. Mir näme wider unheimlech viu Idrück mit hei.

Am Tag druf heimer de üsi Bootsfahrt nach Siem Reap gstartet und si gspannt gsi was üs erwartet. Im Internet heimer sehr zwiespäutigs gläse, die einte hei die Fahrt aus eis vode beschte Erläbnis in Kambodscha beschriebe, die angere hei gseit es sig eis vode schlimmschte gsi. Eine hets de zimlech guet ufe Punkt brocht: "Wenn es Pussi bisch und Komfort bruchsch, denn isch die Fahrt nüt für Di. Wenn ä unkomplizierte Reisende bisch wo ou mou mit weni Komfort uschunt und wosch z reale Läbe gse, denn wirds dr gfaue". Üs jedefaus hets unheimlech guet gfaue, äs isch soo schön gsi. D Fahrt duuret um die 7 Stung und windet sech zersch dürne eher änge Flusslouf mit viele Kurve, verbi a Lüt wo uf Boot läbe, Fischer mit ihrne grosse Netz und Farmer wo ide flachere Gägende ihri Acker bewirtschafte. Je nach Johreszit isch dr Fluss fasch gar nid befahrbar, oder aber är glicht amene einzige grosse See. Bi üs isch dr Wasserstang irgendwie so chli idr Mitti gsi, denn mir hei viu Hüser uf Stäuze troffe wo viele Meter usem Wasser graget hei. Viu hei ou wie so verschideni Stockwärch gha wo mit Stäge verbunge si gsi, s würkt so, aus würde si je nach Wasserstang ufemene angere Level läbe.
So nach 2/3 isch dr Fluss de immer grösser worde und me het de immer meh Floating Villages atroffe. Die Lüt dört hei de nüm würklech uf Boot gläbt, sondern i schwümmende Hüser, hei vorem Huus schwümmendi Gärte gha und ou d Schueu und dr Tämpu isch ufem Wasser gsi. Scho die chlinschte Ching si mit de Böötli umedüset und i dänke, das die vermuetlech chöi schwümme, bevor si lehre loufe.
Ganz zum Schluss isches de när ufe offnig See use gange. Dr Tonle Sap isch riesig, wenn me ufem See isch, denn het me z Gfüeu, me sig ufem Meer, me gseht nämlech z angere Seeändi nid. Wenn me vorauem ir Rägezit äs Satellitebiud aluegi, denn gseng me in Kambodscha ei riese grosse Fläck, wo ä Grossteil vom Land usmachi und das sig dä See. Speziell isch aber ou, dass bi däm See öppis wäutwit einzigartigs passiert, dr Fluss hie wächslet nämlech während em Johr d Fliessrichtig. Wikipedia seit derzue: "Der Tonle Sap ist der grösste See Südostasiens und eines der fischreichsten Binnengewässer der Erde. Von Norden wird der See durch mehrere Zuflüsse gespeist, im Süden tritt der nach dem See benannte Tonle-Sap-Fluss aus, der in Pnom Penh in den Mekong mündet. Jedes Jahr im Juni ist dort ein weltweit einzigartiges Naturphänomen zu beobachten. Der Mekong führt zu dieser Zeit auf Grund der Monsunregenfälleund durch das Schmelzwasser aus dem Himalaya bis zu vier mal mehr Wasser als in den trockenen Monaten. Da Kambodscha ein grossteils sehr flaches und ebenes Land ist, drängt das Wasser des Mekong in den Tonle-Sap-Fluss und dieser wechselt die Fliessrichtung. Die Wassermassen drängen zurück in das Becken des Tonle Sap und füllen den See, der während der trockenen Jahreszeit eine Oberfläche von 2600 - 3000 Quadratkilometer aufweist, bis er auf ca. 10'400 Quadratkilometer (inkl. umliegende Flusslandschaften bis zu 25'000 Quadratkilometer) anwächst und bis zu fünf mal so tief ist (von 2-3m auf 14m). Der Höhepunkt der Überflutungen wird im September erreicht. Zu diesem Zeitpunkt ist knapp ein Drittel der landwirtschaftlichen Kulturfläche Kambodschas von Wasser bedeckt. Erst im November, wenn der Mekong wieder weniger Wasser führt, wechselt der Fluss erneut die Richtung und das Wasser des Sees fliesst langsam ab".


mehr lesen 0 Kommentare

Mi

17

Dez

2014

Pnom Penh

Nachere katastrophale Aareis heimer im erschte Momänt Kambodscha nid würklech chönne gniesse. Mir hei de das aber so guet wie müglech versuecht z verdränge und hei de d Schönheit und d Härzlechkeit vode Lüt glich chönne gniesse. Kambodscha isch landschaftlech wunderschön und d Härzlechkeit vode Lüt isch überwäutigend. Me gset däm Land a jedem Egge ah, was fürne herti Vergangeheit dases hingersech het und was fürnes schwirigs Läbe d Lüt hie no geng hei. Aber glichzitig si d Lüt hie trotz auem schwäre sehr ufgsteuti, härzlechi und hiufsbereiti Lüt wo offe und nöigierig dür d Wäut gö.
Für mi het Kambodscha optisch einigi Ähnlechkeit mit Myanmar, bim gneuere häreluege steut me aber grossi Ungerschide fescht. Im Momänt si beidi Länder äuä öppe ufem gliche Entwickligsstand, beidi aber us komplett angere Gründ, was die grosse Ungerschide erklärt. Myanmar isch uf däm Stand, wüus vorhär kei Zuegang zur Ussewäut gha het, Kambodscha wüus kei Gäut het. I dänke scho i es paar Johr wird Myanmar Kambodscha um lengene vorus si. 
Wenn me nach Kambodscha chunt, denn ischme äuä zersch mou schockiert, dases überau dräckig isch, Abfau umeligt, eim gruseligs Ässe abotte wird, usw. Aber genau so schnäu vergisst me das wider, wenn me mit de Lüt is Gspräch chunt und die Härzlechkeit erläbt, dänki zumindescht.
Wär in Pnom Penh startet, dr Houptstadt, dä darf sech vo dere Stadt nid lo blände, denn die het mitem räschte vo Kambodscha nid viu z tüe, glichzitig isches aber natürlech ou Kambodscha. Es isch haut eifach dräckiger, luter, wiuder aus au die angere Örtli womer gsi si, sprich wär am Afang ab dene Sache schockiert isch, söu müglechscht schnäu zersch mou zur Stadt us und dr räscht gse und nid scho nach Pnom Penh das Land abschribe.
Mir hei üs in Pnom Penh vorauem fürd Killing Fields und fürs  S-21 Prison interessiert und es het sech ächt glohnt, das z gse, ou weni immer wider vo nöiem überrascht wirde, wie real das Ganze hie doch isch, do isch nüt gschöniget und nüt zensiert. Wär schwachi Närve het, list dr nöchscht Teil gschider nid. Hamer lang überleit öbis überhoupt söu schribe, aber schlussändlech ghörts ou zum erläbte derzue! Sowohl d Killing Fields aus ou z S-21 isch vor Zit wo die rote Khmer das Land terrorisiert hei, Höchschtform isch zwüsche 1975 und 1979 gsi. Während dere Zit si Millione vo Lüt uf brutalschti Art und Wiis ermordet worde. Z Volk isch versklavt worde und het für es chli Riisbrei fasch rund um d Uhr müesse schaffe... scho das hei vili nid überläbt. Wär sech nid benoh het (und ä Fähltritt isch scho gsi, wenn öpper ä Banane oder so "klaut" het), denn ischer is S-21 cho, ä ehemaligi Schueu wo ines Gfängnis umbout worde isch. Wär das läbig verlo het (vili si scho hie nach Folter und Torture verstorbe) dä isch zude Killing Fields cho, em definitive Ändi. Hie si d Lüt mit verbundene Ouge mit Lastwage härekaret worde und de diräkt vor de Massegräber umbrocht worde. D Killing Fields chli usserhaub vo Pnom Penh si nur eis vo viune, das wo aber am beschte zuegänglech isch. Dr Ort mit dene Massegräber isch hüt äs grössers Areal mit Böim, Büsch, emene See und emene Dänkmahl für aui die wo verstorbe si. Tönt ufe erscht Blick nid so dramatisch... zumindescht bisme dr Spaziergang startet. Me macht das mitemene Audioguide wo eim a de verschidene Statione verzeut was dört gsi isch. Vode Gebäude isch nüt me übrig, es si nur no Schiudli ade entsprächende Ört und dr Guide seit eim, was dört gsi isch. Jedoch si d Gräber no vorhande. Es paar si usghobe worde, vili aber nonid. Ufem ganze Gehwäg chöme immer wider Chleiderfätze und Chnoche zum Vorschiin wo ir Rägezit freigleit wärde. Dört wird eim de würklech bewusst wome sich befindet. Denn hets ou immer wider Brichte wo dene wenige Überläbende und vo dene vor rote Khmer, wo verzeue, wie si das erläbt hei. Das geit eim de när scho sehr nöch. Und zum Abschluss chunt me de zum Dänkmahl, wo mit 10'000 Schädle vo gfüut isch, wo aui hinger Glasfassade si. Spötischtens hie wird eim z Usmass würklech bewusst.
Weme de aschliessend is S-21 fahrt und gset, was vor de Killing Fields gsi isch, denn merkt me, das d Lüt so ziemlich vom Räge id troufi cho si, sprich vom einte Eländ is nöchschte. Z S-21 isch früecher mou ä Schueu gsi, isch vode Khmer aber ines Gfängnis umbout worde. Sprich me het usse eifach Stachudroht abezoge und rudimentär chlini Zäue id Schueuzimmer bout. Chli heisst, öppe 70cm x 100cm, ohni WC oder süsch öppis. Au drü Mönet isch usse eine verbigloffe und het zum Fänschter igsprützt, die einzigi Müglechkeit für d Lüt zum dusche. Bi eim Gebäude isch dr Stachudroht no dranne und die ineboute Verlies si ouno do. I eim isch sogar es Schiudli, dass das Zäue sig gsi vomene Überläbende... Es het genau 7 Persone gä, wo das Gfängnis am Schluss läbend verloh hei. Sibe, vo viele tuusig und zwar nid nur Erwachsi, sondern ou Ching, Müetere mit Babys, etc.
Dür d Schueuzimmer si zudäm Grossi Leinwänd ghänkt mit aus Föteli druffe, vo dene Lüt, wo im Gfängnis gsi si und wo d Föteli im Gfängnis ufgno worde si. Zum Teil si d Föteli vor Iliferig, zum Teil vor oder nach Folterige zum Teil churz vor dr Hinrichtig. Und das aues näb dr Usstellig vode Folterinstrumänt. Das geit eim auso töif unger d Haut, uf die angeri Sitte isches aber ou öppis, wo d Lüt in Kambodscha prägt und wome sech nid dervo darf verschliesse. Ersch weme das gse het, chame vieles im Land verstoh.
Üse Tuk-Tuk-Fahrer wo üs a däm Tag umegfahre het, het de bim Mittagässe gmeint, är würdi üs gärn no mit i sis Dorf und zu sinere Familie näh, damit mir gsenge, wie die so läbi. Und de heigs dört ouno ä heilige Bärg womer chönne gse. Das isch für üs de ä super Szenewächsu gsi, nach au dere tragische Vergangeheit jetz mou z reale Läbe z gse. Sis Huus het ufe erscht Ougeblick relativ gross gwürkt, äuä so öppe 90m2. Aber womer de gse hei, wär dört inne aues läbt, isch das Huus immer meh gschrumpft. Nid nur är, si Frou und sis Baby wohne dört, nei ou ihri Eutere, dere ihri gschwüschterte mit Familie, Ungle, Tante und weis dr Tüfu no wär aues. Kei ahnig wie das funktioniert, aber hie het sicher niemer mit Vereinsamig z kämpfe! Vorauem si Schwigermueter isch luschtig gsi, so ä richtig zackigi Frou und so wie die uf d Frücht igschlage het, sicher ou eini wosech cha düresetze ;)

Apropos herts Läbe: Üse Tuk-Tuk-Fahrer het ouno i üsem Guesthouse gschaffet. A däm Tag wo mir mit ihm si ungerwägs gsi, het är scho vorem sächsi Früehstück serviert, isch de mit üs dr ganz Tag umegfahre und es paar Minute nach däm mir zrüg si gsi, ischer scho wider am serviere gsi. Das selbe am nöchschte Morge und so wies usgset siebe Täg ir Wuche. Nüt mit Weekend und Freizit. Ou ade Orte womer när übernachtet hei, het sech z gliche abzeichnet. Die agsteute vor Reception hei sogar uf verlotterete Ligistüeu oder Houzbänkli vor dr Reception gnächtiget, meh aus einisch heimer se zum Schlof us grisse, wenn mer am Morge früe los hei müesse. Und bide Tuk-Tuk-Fahrer isch z Biud grad z gliche gsi, die wo am Obe am 12i no Lüt hei gfahre hei, si die gliche gsi, wo am Morge am haubi Füfi Lüt zum Angkor Wat, zum Boot oder zum Flughafe gfahre hei. Gschlofe wird denn, wenn grad Zit isch, sprich wenn d Kliente grad öppis erkunde oder denn zwüsche zwe Kliente. Ou wenn me im erschte Ougeblick dänkt, die heige es geils Läbe, dass die aui do i ihrne Chäreli chli ar Sunne chöi dööse, d Realität isch definitiv ä angeri.




mehr lesen 0 Kommentare