Mo

05

Jan

2015

Bali

Sit am 22. Dezämber bini in Indonesie ungerwägs, mehrheitlech in Bali. Eigentlech isch jo dr Plan gsi, mind. no ä zwöiti oder dritti Insle z gse und z Bali nur ganz churz z blibe, aber dank em chrank wärde heimer üs schlussändlech de entschide, nur Bali z mache. Zersch bini rächt enttüscht gsi, aber jetz muesi säge, dass das gar nid so schlächt isch. So hets jetz Ferie vom Reise gä und das duet ou nid schlächt. Zudäm hani so d Chance becho, viu go z touche und da mi d Touchliideschaft scho vou packt het, passt das wunderbar :)
Da das jetz äbe ou Ferie si worde und nid reise, gits eigentlech ou nid ganz so viu z verzeue. Agfange heimer in Kuta, somene grosse und nid würklech schöne Touriort, womer dank Yann sire Grippe schlussändlech lenger blibe si aus planet. Aschliessend isches uf die chlini vorglagereti Insle Nusa Lembongan gange, wome super guet cha touche und schnorchle unds wunderschöni Riff het. Hie hani ou zum erschte Mou ä Drift Dive gmacht und grossi Meeresschiudchröt sowie Mantas gse (näbscht de viele luschtige Chugufisch wo mir uuuu guet gfaue). Ä Mola Mola heimer leider nid gse, im Momänt isch nid Saison. Si säge, das si zur Zit nur so au 2-3 Wuche mou eine gse. Aber mi het ou scho dr Manta mit sine 3m Spannwiti imponiert, dr Mola Mola hebi mir für spöter uf ;)
Vo Nusa Lembongan isches zrüg ufs Feschtland nach Ubud gange. Ou hie heimer nur ganz churz wöue blibe, aber natürlech bi ig chrank worde und mir si lenger feschtghocket. Wider gsung isches de när uf Pemuteran gange, ä chline Ort ganz im Norde, diräkt näbe Pulau Menjangang. Pulau Menjangan isch ä chlini Insle öppe 2 km vor dr Küschte wo komplett unger Naturschutz steit und nid bewohnt isch. Zu däm Naturschutzgebiet ghört ou z vorglagerete Riff wo wäutwit aus eine vode schönschte Touchplätz bekannt isch. Und was söui säge, äs isch würklech ä Troum. So viu verschideni Koraue und so viu Fisch uf eim Huufe isch ä Troum. Das lüchtet i aune Farbe, mega.
Vo dört simer när is Hochland uf Munduk, womer ä wunderschöni Wanderig düre Rägewaud und umene Vulkansee gmacht hei, bevors de wider a Beach abe isch nach Tulamben. Hie ligt vor dr Küschte z Wrack vor US-Liberty und i cha zum erschte mou go Wrack-Touche, no derzue bimene sehr bekannte Schiff. Jo und zum Abschluss geits de no nach Bangalan dr Haubinsle vor Denpasar wos u schöni Stränd söu ha und super Wäue zum surfe. I ha ou d Hoffnig, dases gnue Wind zum Kitesurfe het, aber das isch no offe, wird sech de zeige. 
Augemein isch Bali ä wunderschöni Insle und grad dr Norde isch nid speziell Touristisch. Und da jetz d Rägezit isch, hets sowieso fasch keini Touris, auso sehr agnähm. D Lüt hie si sehr offe und ufgschlosse und sehr härzlech und hiufsbereit, so wiemers überau in Asie erläbt hei. Ou Indonesie isch es Land, woni unbedingt nomou wot cho und witeri Insle wot go erkunde (i mues mind. 100 Johr läbe zum au mini Plän chönne umsetze :/)





0 Kommentare