Di

03

Mär

2015

Port Douglas und d Salties

Mit mim Touchbuddy ar Nicole bini de no für zwöi Täg uf Port Douglas ufe chli go entspanne. Port Douglas isch u schön, aber zu dere Johreszit komplett usgstorbe, fasch aui Restaurant hei zue und es het so zimlech gar keini Lüt ungerwägs gha. Aber das isch für üs jo super gsi, denn mir si beidi nid so Touriste Fan :p
I ha de üse nätt Hostelbsitzer gfrogt, wome in Port Douglas uf sicheri Art und Wiis äs wiuds Sauzwasserkroki gse und är het de gmeint, es heig mits im Ort so ä chlini Lagoon und dört sig zur Zit eis drinne. Auso bini de dört häre daggelet (d Nicole het ir Zwüschezit gshoppet) und bi das Saltie go sueche. Das heisst, i ha eigentlech nur d Lagoon gfunge und die isch komplett voupflaschteret gsi mit Warnschiudli. Und dr Wäg um d Lagoon isch grad mou ä Meter vom Wasser entfernt gsi... Irgendwie het dr Hosteltyp und ig ä ungerschidlechi Vorstellig vo "sicher". I hami de zimlech schnäu vom Acker gmacht und das Experimänt Wild-Kroki-Watching vertagt. Stattdesse bini de z Wildlife-Center go aluege, das isch ächt schön gmacht und git eim ä guete Iblick id Tierwäut do obe. Am nöchschte Tag bini de is Hartleys oder wie das heisst, so es Kroki-Zäntrum wos zum einte ä Lagune mit wiude Krokis het und me mitem Böötli cha go ä Rundfahrt mache (mitemene panzerete Böötli versteit sech). Denn heisi ou no so ä Krokifüeterig gha wome die Dinger gset jumpe und Roue mache und dr Chopf schüttle. Isch sehr idrücklech gsi das Ganze und würklech spannend was si aus verzeut hei. Weniger begeischteret bini vor Krokodilfarm gsi wo grad agränzt het, dört heisis auso aues angere aus schön. So chlini flachi Pools komplett mit Plastik am Bode uskleidet und chli Wasser dinne, thats it. Und das heisech de ouno öppe 50 Viecher mitenang müesse teile. I weiss wieso ig gäge Krokodilprodukt bi.
Am gliche Ort hets de ou no ä Präsentation vo Schlange gä, unger angerem dr Inland Taipan, die giftigschti Schlange vor Wäut und d Brown Snake, eine vode Top 7 vode giftigschte Schlange. Und dr Typ wo die Präsentiert het, het nüt bessers gwüsst, aus bis ufene Meter mitem Chopf vo dene Schlange zu mir z cho. I ha de zimlech schnäu mi Sitzplatz z vorderscht mit dr beschte Sicht gäge eine relativ wit hinger ituuscht. Faus är die hätti söue lo gheie, wäre zersch es paar angeri Bei gsi wo d Schlange hätt chönne bisse :) Aber sisch uf jede Fau sehr spannend gsi, waser drüber verzeut het, jetz weisi wider chli meh über mini "Lieblinge" :p
Eigentlech hätti vo däm Ganze so richtig richtig geili Föteli gha... Mit betonig uf "hätt!". Dummerwiis hani se vor SD-Charte glöscht, bevor ig se ufs Ipad glade ha. I hoffe jetz ganz fescht, dasme die dehei de wider cha härsteue, damit ig die wider zrüg bechume, wär richtig schad wenn nid!

Übrigens die Krokis hie uf de Föteli si, si Freshies, ungfährlechi Süesswasserkrokodil wo nur öppe 2 Meter si. D Salties hei äs breiters Muu, nid so es schmaus.






0 Kommentare

So

01

Mär

2015

Cairns - Great Barrier Reef

Zimlech am Schluss vo minere Oustralie-Reis isch de mis absolute Highlight no cho, das woni mi am meischte druf gfröit ha. Und es isch de ou tatsächlech es Highlight worde, wüu mir absoluti Troumbedingige gha hei, z Wätter hets mou wider u guet mit mir gmeint.
D Red isch vom 3-tägige Touchtrip zum Great Barrier Reef mit zwe Nächt ufem Boot. Mir hei pro Tag drü Tagestouchgäng gha und ade erschte zwe Täg zuesätzlech no je ä Nachttouchgang und es isch grandios gsi. So viu bunti Koraue und grossi Fisch. Mis Highlight isch natürlech d Begägnig mit mim erschte Hai gsi, emene Wissspitze-Riffhai. Chli spöter hani de ouno Schwarzspitze-Riffhai gse. Und die grosse Schiudchröt i ihrem natürleche Umfäud z gse, isch säubverständlech ou mega gsi. Eine dervo isch 146 jährig und het ä Panzerlengi vo ca. 2 Meter, soooo idrücklech. I wett am liebschte grad wider zrüg und go witertouche ;)
Mir hei aber ou ä Super Dive-Company gha und es isch würklech top organisiert gsi.
Einzig trurig isch gsi, dases scho relativ viu tots Riff gha het. Das ligi zum einte a sonere spezielle Seestärn-Art, denn a dene Toucher wo d Finger nid vom Riff chöi lo und denn haut ou Stürm und so.
0 Kommentare

Di

24

Feb

2015

Magnetic Island

Aus nöchschts isches mitem Bus nach Townsville und vo dört uf Magnetic Island gange. Wider hani vou Glück gha, denn innerhaub vo 3 Täg isch mi Bus dr einzig gsi wo us Airlie Beach abgfahre isch. Aui angere Busse si wägem Zyklon gstriche gsi, da die zwüsche Brisbane und Rockhampton feschtghocket si. I ha auso planmässig chönne reise und ha no derzue Magnetic Island fasch für mi gha, wüu keine het chönne do häre fahre und zuesätzlech no low Season isch gsi. Was wot me meh ;)
Magnetic Island isch würklech härzig und het mir guet gfaue. I ha so imene chline Bungalow mits im Waud übernachtet und d Wäng si nur us Moskitonetz gsi. Me het auso vom Bett us chönne useluege und die wiude Wallabys, Possum und Vögu chönne beobachte. Und ir Nacht het me z Gfüeu gha, me schlofi unger freiem Himu im Waud. Einzig dases ou nachts no 29 Grad isch gsi (dinne wie dusse) isch chli asträngend gsi. Aber jo, darf mi nid beklage, d Schwizer hei jo mit 0 Grad und weniger z kämpfe :p
I ha de zäme mitere Dütsche mou no ä Wanderig gwagt, mir hei aber fasch wöue stärbe, es isch soooo heiss gsi. Für 3km heimer öppe 2h brucht, aber si derfür ou mitemene wiude Koala und einige spezielle Insekte belohnt worde. Und am obe hani mini erschte Rockwallabys gse und de erscht no wiud, die si sooo knufflig und so chli. Mir hei chli Gmüesräschte vom Hostel mitgno und se de chönne fuetere. Eigentlech bini jo gäge z fuetere vo wiude Tier, aber hie hani eifach irgendwie nid chönne widerstoh...
0 Kommentare

So

22

Feb

2015

Airlie Beach - White Sundays

Ou Airlie Beach isch nüt schöns, es isch haut eifach nur dr bekanntischt Usgangspunkt für Sägutrips zude White Sundays. Und eigentlech weni mer das so im Nachhinein überlege, hätti ou d White Sundays guet chönne usseloh. Es si Insle wie au anger ou, nur das die hie bumsvou mit Tourischte si. Dr legendär Whitehaven Beach isch nid haub so schön wie die wisse Stränd z Tasmanie, aber derfür mit öppe 1000 Lüt gfüut, wo aui ä Bootstour dört häre mache. Eigentlech hätt ig zwöi Nächt ufem Boot gha, glücklecherwiis heimer aber scho nach eire Nacht ufem Boot zrüg i Hafe müesse wägem Zyklon, was mir grad rächt cho isch, ei Nacht het glängt ;) Wägem früecher Reiseabbruch ha ig de no d heufti vom Gäut zrüg becho und ha mir de mit däm ä Scenic Flight über d White Sundays und z Great Barrier Reef gönnt und das het sech 100x meh glohnt ;)
Während relativ viu Lüt ungerem Zyklon glitte hei, hetter für mi eigentlech nur Vorteile mit sich brocht ;)
0 Kommentare

Di

17

Feb

2015

Rockhampton

Rockhampton isch an und für sich kei Ort wome mues gse ha, är isch nid würklech schön. Spannend isch aber z Dreamtime Center gsi, wo vo Aborigines gfüehrt wird und me chli meh über d Kultur cha lehre. Sisch aber sicher nid so spannend, dasmes unbedingt mues gse ha, es git sicher no besseri.
0 Kommentare

So

15

Feb

2015

Hervey Bay

Hervey Bay isch ä härzige chline Ort mitemene schöne Beach, meh gits do derzue eigentlech nid z säge... Nur das z Hostel hie eis vode beschte isch gsi, mits im Grüene und mit gaanz viu Tier, ä Ort wome sech so richtig het chönne entspanne ;)
0 Kommentare

Mi

11

Feb

2015

Brisbane

Über Brisbane gits eigentlech nid viu z säge, es isch haut ä Stadt wie jedi angeri ou. West End het mir rächt guet gfaue mit dene viele Künschtler und em alternative Flair. Und South Bank mit de künschtleche Lagune isch ou cool. Aber die Stadt het jetz nüt a sich, womi lenger dört würd hebe.
0 Kommentare

Mo

09

Feb

2015

Bellingen

Bellingen isch so eine vo mine Lieblingsorte in Oustralie. Das chline Hippieörtli mits im Rägewaud het so ganz ä spezielli Atmosphäre und me het dört z Gfüeu, dasme inere ganz eigete Wäut isch wo ganz eiget tigget. Beschribe chames nid würklech, me mueses eher erläbt ha ;)
Es het relativ viu Usstiger hie und Lüt, wo sehr bewusst läbe. So isch jedes Kafi und jede Shop mit Liebi gfüehrt und das merkt me ou. Es wird ganz viu Wärt uf gueti Qualität gleit und do druf, das zum Bispiu d Läbesmittu aui Bio und organisch si. I ha in Oustralie no nie so guet gässe wie hie. Faus ig irgendwenn würklech nomou nach Oustralie sött cho (wasi mir im Momänt eher nid cha vorsteue), denn würdi uf jede Fau nomou dört häre go.
0 Kommentare

Fr

06

Feb

2015

Port Macquarie

Port Macquarie isch ä chline aber ganz härzige Ort mit wunderschöne Stränd und emene schöne Towncentre. Dört fliesst ä grössere Fluss is Meer und ir Biegig ligt dr Hafe. I dere Bucht oder däm River oder wime das ou immer wot nenne hets einigi Delfine wome ou immer mou wider zu Gsicht bechunt. Eine dervo isch würklech so 1.5m entfernt vode Steine gschwumme, me het ne auso fasch chönne berüehre. Aber ou ä riese Meeresschiudchrot hani gse, die si u schön. Und de hets bim Kayake ouno Waterdragons gha. D Kayaktoure wärde so vomene ganz schrege Hang-Loose-Typ düregfüehrt wo so chli i sinere eigete Wäut läbt. Är macht jede Tag die glichi Kayaktour und da är die Wasserdrache so faszinierend fingt, hetter agfange die mit Banane z fuetere. Wener jetz chunt, denn schwümme si scho uf ihn zue und gumpe vore uf sis Kayak. Uf die einti Art vou spannend zum die gse, uf die angeri Art isch das mitem fuetere haut immer so äs zwöischnidigs Ding.

Ansonschte hets in Port Macquarie no z einzige Koala-Hospital vo Oustralie und es het ä Rägewaud wo diräkt bis as Meer chunt, wos ganz viu Warane het... Leider het sech mir nur einisch ä chline zeigt.

Mi

04

Feb

2015

Newcastle / Port Stephens

Aus nöchschts isches uf Newcastle gange. Ou hie hei aui gfunge, das sigi ä Ort wome guet chönn usseloh und säubverständlech hani mi säuber müesse go vergewüssere, ob das würklech so isch. Und nei, es isch nid so, es git hie ganz viu wome cha mache. Sicher z idrücklechschte isch dr Usflug nach Port Stephens gsi. Zum einte gits dört die wunderschöni Nelson Bay, wo eifach nur troumhafti Stränd het und zum angere sis die riese Sanddüne chli witer vorne. Me chunt sech dört vor wie ir Sahara. Eigentlech hätt me dört ou chönne go Sandboarde und ig hätts ou ächt gärn gmacht, aber es isch so heiss gsi, das ig das nid lang ar Sunne usghaute hätt. Drum simer de haut nur so chli ide Sanddüne umeflaniert. Hie hets ou ä wunderschöne und unändlech länge Beach gha. Jedoch isch dr ganz Beach vouer grosser Jellyfish (Qualle) gsi. I ha de ä eutere Oustralier dört gfrogt, öb die giftig sige und öb är wüssi, was das für welchi sige und dä het mir de grad ä riese Vortrag über die Tier ghaute. So hani jetz zum Bispiu mou ä grosse Jellyfish ide Häng gha, i weiss jetz wo z Fueter ine geit und wos wider use chunt und i kenne dr Ungerschied zwüsche Männli und Wibli. Genau so wini jetz weiss, dases a däm Beach no öppe 6 angeri Spezies gha het, wovon die chlinschti nur es paar Millimeter gross isch und die gröschti um die 30 cm. Vo au dene dört isch nur eini gfährlech, ä blaui mitemene Durchmässer vo öppe 2-6cm, wo aber öppe 2-3m längi Tentakel het wo brönne. Und i ha ou glehrt, das weme hie a Strand geit, me immer es chlises Fläschli Essig mitnimmt, da das chönn Läbe rette.

Newcastle säuber isch vorauem bekannt für sini viele Kunstgalerie und für die schöne Beaches (ok, für die si fasch aui Ortschafte ar Ostküschte bekannt). Äs isch uf jede Fau ä Stopp wärt.


0 Kommentare

Mo

02

Feb

2015

Sydney / Blue Mountains

Die nöchschte paar Täg hani in Sydney verbrocht, imene Hostel wo diräkt ar Langstross vo Sydney gläge isch gsi. Vo dört us hetme aui Stadtteile schnäu erreicht und ou z berüehmte Operehuus het me z Fuess chönne erreiche. Sydney het mer u guet gfaue, wüu si haut so nöch am Meer bouet isch unds überau Wasser und grüeni Pärk het. Ansonschte gits zu Sydney nid so viu z verzeue, es isch haut ä Grossstadt, wis se überau rund um d Wäut git, mit de gliche Läde, wos ou i jedem angere Land git. 


Vo Sydney us isches zude Blue Mountains nur ä Chatzesprung und so hani de ouno ä zwöitägige Usflug dört häre gmacht. Dr Ryan, ä Biolog us Louisiana het sech de spontan no agschlosse, was super gsi isch, wüu är u viu über Pflanze und Tier gwüsst het und oftmals Sache gse het, wo mir nid ufgfaue wäre.
D Blue Mountains schiine tatsächlech blau, was anschinend am Öl ir Luft ligt, wo d Eukalyptusböim abgä. Mir hei de zwe Wunderschöni Wanderige zu u schöne Wasserfäu gmacht und hei unger angerem ou ä schwarze Kakadu und irgend sone komischi Süesswasserlanguschte gse. Gottseidank kei Schlange (dr Ryan isch ganz zu mim Leidwäse ständig uf dr Suechi gsi nach welche).
0 Kommentare

Di

27

Jan

2015

Canberra

Mi nöchscht Zwüschehaut isch z Canberra gsi. Mir hei viu gseit, dasme die Stadt guet chönnt usseloh, es gäbi dört nid viu z gse und genau darum bini dört häre gfahre. I ha dänkt, das sig ä super Ort, zum eifach mou zwöi Täg chli z relaxe und nüt z mache. Zwöi Sache hani derbi aber leider vergässe z berücksichtige... Zum einte isch a eim vo dene Täg Australia Day gsi, sprich dr Oustralisch erscht Ouguscht, und zum angere isch Canberra d Houptstadt vo Oustralie, öppis woni leider ou ersch dört glehrt ha *schäm*
Dämentsprächend isch natürlech nüt us dr Rueh und em nüt mache worde. I bi dört am Morge am vieri acho und ha eigentlech dänkt, verbring dr Tag ganz gmüetlech, göng go ichoufe, chli go umeloufe und denn ganz früe is Bett. Und wo geit me häre, wenn me si Rueh wot??? Natürlech i botanisch Garte, und zwar i gröscht vo ganz Oustralie. Leider hani vergässe, das d Oustralier üsserscht hiufsbereit si und scho nach es paar Minute het sech ä euteri Frou zu mir gsellt, wo mir überne Stung die ganzi Flora und Fauna erklärt het. Oder zumindescht d Flora und Faune vo dene Teile vom botanische Garte, wo im ungere Teil agsidlet si gsi, när het si witer müesse. Aber statt mini Rueh jetz chönne z gniesse, isch säubverständlech grad die nöchschti cho und het mir no die angeri Heufti erklärt. Und de isch zu auem Überfluss a däm Tag ouno äs Countrykonzärt im Botanisch Garte gsi, wo dere Frou ihre Brüeder dr Sänger dervo isch gsi. Auso het si mi de grad mitgschleppt und mit ihrere gsamte Familie (öppe 20 Persone jegleche Auters) und ere riese Ladig Pizza heimer de das Konzärt gnosse. Eigentlech isches vou cool gsi, isch nur blöd, weme die ganzi Zit derbi fasch ischloft. Irgendwenn am nüni oder so hani mi de ändlech ufe Heiwäg chönne mache, chum bini aber im Hostel acho, het ä euteri Frou gfunge, i gseng so hungrig us, i müess jetz unbedingt mit ihre Znacht ässe. Aues proteschtiere het nüt gnützt, auso hets de haut no ä zwöiti Mahlzit und no geng kei Schlof gä.
Und ou z usschlofe am nöchschte Tag isch is Wasser gheit, da mi scho am sibni am Morge ä Dütschi wo bi mir im Zimmer isch gsi derzue überredt het, mit ihre i Park z go. Dört hets so äs riese gratis Public-Zmorge zum Australia Day gä mit ganz viune Festivitäte drumume. Denn isch ouno z Nationalmuseum göffnet und gratis gsi mit verschidene Aktivitäte. Und aus hätts dr Zuefau wöue, isch ouno grad ä spezielli temporäri Usstellig zum Thema Ross und Oustralie gsi, wo no spezieller a däm Tag Themetag isch gsi mit Ponyritte, Rittvorfüehrige, Rasseshow, Handwärkshow (z.B. Kutscherädermacher, Sattler, Schoukupferdbouer, etc.). Und wie sech das so ghört, hets am Obe ouno äs riese Füürwärch überem See diräkt vorem Parlamäntsgebäude gä, sprich wider ä komplett voue Tag und nüt mit relaxe.
Aber derfür sis zwe superschöni und tolli Täg gsi ;)

0 Kommentare

Fr

23

Jan

2015

Melbourne / Queenscliff

Da ig vor 3 Johr scho mou ä Wuche z Melbourne bi gsi, isch dr Ufenthaut dasmou chli chürzer usgfaue, derfür hets no ä Usflug nach Queenscliff gä, wome mit Robbe und Delfine cha go schwümme. Leider heisech d Delfine nid wöue zeige, aber immerhin heimer d Robbe gse und die si u luschtig z beobachte und isch ou vou spannend, wie die so im Wasser lige mit Chopf gäge abe und so minutelang usharre. Und sobaud si de äs entsprächends Tier gse, touche si blitzschnäu ab und hole sech dr Läckerbisse. So öppis chame im Zoo nid beobachte, das isch nur ir Wiudnis müglech. Für das hani sogar ischchauts Wasser (är het gseit 18 Grad, i säge es isch öppe 15 Grad gsi) i Chouf!
0 Kommentare