Mi

20

Mai

2015

Tilcara und Umgäbig

Vo Iguazu isches när über Salta (die erschte 6 Föteli si vo dört) nach Tilcara gange, woni no immer bi. Tilcara isch ä chline Ort mits ide Bärge, ganz im Norde vo Argentinie und relativ nöch vor bolivianische und chilenische Gränze. Är isch uf 2400m über Meer und het Bärge ide schönschte Farbe z biete. Und ä strahlend blaue (sones Blau ha ig no nie gse wie hie) völlig Wulchelose Himu. Äs het mir sooo guet gfaue hie, dasi schlussändlech grad 5 Nächt blibe bi. Vo Tilcara us chame zum Garganta del Diabolo (ä Schlucht) wandere, dr Bus nach Uquia näh und dört zu bunte Gebirgschettine loufe oder nach Humahuaca und vo dört us mitemene Jeeptaxi (sofern me das no Jeep darf nenne) uf 4300m ufe fahre und dr toll Usblick uf die bunte Bärge vo Quebrada del Humahuaca gniesse.
Die Iheimische hie si viu weniger Europäisch aus in Cordoba oder Buenos Aires und me gspürt scho starch dr bolivianisch Ifluss. D Lüt hie läbe vorwiegend vor Landwirtschaft, sprich vo Schof, Lama und Esle. Und natürlech ir Zwüschezit ou vom Tourismus, wasme sehr starch gspürt!
Aber es isch no immer sehr ruhig, gmüetlech und perfekt zum entspanne (vorauem ou wüu am Nomitag immer Siesta-Time isch :))
Morn geits de när witer nach Chile id Atacama-Wüeschti, woni mi ou sehr druf fröie. Ou dört mues d Landschaft eifach nur grossartig si!!





0 Kommentare

Mi

13

Mai

2015

Buenos Aires, Cordoba und Iguazu

I ha zum Reise nur z Handy mitgno und keis Ipad, drum isches mir ou nid müglech, d Föteli vom chline Fotiapparat ufs Handy z lade, sondern nur vom grosse Föteler wo WIFI het. Genau us däm Grund gits hie ou keini Föteli vo Buenos Aires und vo Cordoba, denn die si äbe aui ufem angere Föteler. Derfür umso meh vom Amazonas und de Iguazu-Fäu :)
Buenos Aires säuber isch ok, aber mir isches z gross und zweni grüen und i ha nüt dergäge gha, nach es paar Täg d Stadt chönne z verloh. In Buenos Aires hani de dr Tomàs us Cordoba (Argentinie) lehre kenne und d Caro us dr wäutsche Schwiz. Dr Tomàs het mi und d Caro de uf Cordoba zu sich und sinere grosse Familie iglade und mir si de dere gfougt und fürne Wuche uf Cordoba, woni ou no es paar Privatlektione Spanisch gno ha, zum wenigschtens einigermasse z Schlag z cho.
D Familie, bestehend us sine Eutere, sine zwe Brüdere und zwe Schwöschtere isch super gsi und mir hei üs wie im 5-Stärn-Hotel gfüeut und si ständig bechocht worde und so. Wahnsinn. Mir hei de mou no ä Usflug nach Villa Carlos Paz und eine eine i Parque Nacional Quebrada del Condorito gmacht, woni ou mini erschte Kondore gse ha. Ir Sprachschueu heimer no es Päärli us Holland/Schweiz lehre kenne wo viu mit üs in und um Cordoba ungerno hei. Denn am letschte Sunntig heimer de z viert Cordoba verlo (z Päärli und Caro) und hei üs ufene länge Wäg nach Puerto Iguazu gmacht, zum die fantastische Wasserfäu (eis vode 7 Wäutwunder) go z bsueche. Und was söume säge, die si würklech einmalig. Dr Fluss het ä Durchmässer vo 3km (mit verschiedene Inseli derzwüsche) und über die Lengi erstrecke sech ou d Wasserfäu. Eifach nume Wow!!!
Ups mis Phone het kei Akku me, witeri News fouge de ines paar Täg us Salta, Jujuy, Salar de Atacama (Chile), Salar de Uyuni (Bolivie), La Paz, vom Titicacasee, Cusco (Peru) und usem Amazonasbecki :)









0 Kommentare